世界盃手記最終回

7月9日：決賽 意大利對法國 1：1(十二碼：5：3)

時：三點
地：自家
人：本人，小弟

意粉隊最高﹗歐洲四星戰隊﹗﹗﹗

先伸報利益，基於法國兩次擊敗意粉隊，本人係好憎好憎法國隊… 以下內容完全唔客觀，法國粉絲唔好打我呀…

比賽早段看得我冷汗真標--唔係咁快輸個十二碼呀話馬達拉斯哥﹗C丹一射破網，當然我相信意粉隊的攻力可以追番，但心硬係唔安樂--話晒意粉隊死係法蘭西手上兩次﹗

誰不知馬兄轉頭就頂入番，將功補過，真係神又係你鬼又你﹗個心安樂晒，心滿意足之下就接受了周公子的邀請，「恰」著咗…原來我miss咗好幾個精彩射門和撲救，無計，真係好眼瞓，唯有聽日睇重播。

多得一班無記的講波佬大叫我先醒番，原來加緊時﹗仲要C丹食紅牌﹗一看之下佢搵個頭撞人家心口喎，本來球證睇唔到，後來經方證一提先補番個紅牌，班講波佬we嘩鬼叫，如夢初醒的我仲以為有人入咗黃金入球呀大佬…

重諗住人多蝦人少之下可以重演上次廿八分半入波無仇報之計，原來「臘味」教練一早換晒三個換人名額，班球員又一味守和，任得法國攻，睇落完全唔似打少個，講波佬話佢一心諗住射十二碼…係唔係架，攻唔入咋嘩…

射十二碼之前本人個心狂跳中，真係好驚重演98世界盃惡夢(好在重演不了04歐洲國家盃的金球事件)。射下一個射下一個，今次真係爭氣啦，全部入晒﹗波皮都摸唔到﹗復仇成功﹗

嬴波後例牌要癲晒咁慶祝，唔知係咪降班風波下獲得的勝利特別可貴，意粉隊慶祝得特別癲，落髮、除褲咩都有，仲有簡隊長指揮唱歌﹗全晚我最精神就係睇呢part。

90年意粉做主辦國就係西德勝出賀與東德合併，今次到德國主辦就到意粉捧盃，真係幾巧合﹗頒獎時好似琴日咁播住當年主題曲《To be number one》襯底，成個畫面係何其感動﹗真係睇到眼濕濕﹗尤其是賽前無咩人會睇好意粉隊入決賽(包括我…慚愧…)，打出嚟嘅波雖然無森巴隊咁悅目，但比起前兩屆中後場真係好穩陣，簡隊長和保龍門兩個人真係保住後方，固若金湯﹗(可惜尼斯達傷了…)小小污點就係略嫌毛手毛腳動作多了點，紅牌和點球又多了點；馬兄和格兄更成日走上前場頂入致命一球，真係唔講得少﹗中場王子成日都無影，好在佢啲傳送依然到位；派路直頭係上身，派咗幾廿路好波出來﹗只可惜前方東尼入得兩粒咁少，而本人至愛的AC恩沙基又出得一場咁大把，好在都入咗一粒﹗

成了四星戰隊，我喺揭幕戰嗰日買的三粒星電話繩成了絕版﹗呵呵呵
<--身痕買的綠邊綠白紅con，勁有型﹗

一吐兩敗於法蘭西手上的烏氣，個感覺真係好
FANTASTIC

勝利屬於意大利、屬於格羅索、屬於簡拿華路、屬於森保達、保方、屬於馬甸尼，屬於所有熱愛意大利足球的人！ (又再借黃健翔語錄一用﹗)

(過了世界盃，我可以有覺好瞓了，這是我看了四屆以來第一次唔使哭波喪﹗嗚嗚)

世界盃手記：
世界盃手記之七
世盃難忘片段