2006/11/06

張敬軒《笑忘書》

巨基的《我生》煲了一排終於有挑戰者,這兩日本人熱煲的是張敬軒《笑忘書》。

話說某日邊煲劇邊睇波,和小弟談起近期愛歌,本人提出一大推日劇主題曲(《一升》和《瑠璃之島》~),小弟就不停推介《Gundam SEED》,竟然都是日文歌,不過雞同鴨講,因為他不看日劇我唔睇Gundam,完全溝通唔到。

雖說本人全神留意日文歌,但今年有幾張廣東碟著實不俗,令本人一聽再聽:巨基《我生》,《花灑》長煲長有;然後謝安琪《KSUS2》;再有藍奕邦《潮騷》,光是一首《爸爸今天不歸家》已夠長霸本人熱煲排行榜首位;今勻到張敬軒,《笑忘書》著實不俗,本來本人正期待克人新碟的啊,但對不起,遲啲再聽呀吓。

之前見幾位blogger撰文讚這碟,說這碟是張敬軒正式打入香港市場云云,興趣就來了。尤記得幾年前他出第一張碟時正值本人雙失,無聊日子不停狂煲碟中感同身受的《My Way》,而他年紀和本人差不多份外多份親切感,直把他當作同年畢業的同學仔,倒忘了他來自何方;總覺得歌手唱得好就行,實不應分是祖國出品還是香港出品,其實又有甚麼分別?說實他唱得比好些本地「歌手」好,也希望他假以時日能成大器。不過聽下去總覺得他的腔口有點賣弄,Ad-lib多得…我有點頂唔順,直至《Hurt So Bad》前都沒太留意。

講完前言,講歌了。

家陣的主打歌《餘震》、《老了十歲》和《病況》有點典型的公式情歌,《餘震》在流行榜反應不錯,不過唔係本人杯茶,哈哈,是我口味怪罷了。

本人的茶是第四cut《笑忘書》,放輕了的唱腔,說教味頗濃的歌詞,尤喜歡一句「得到同樣快樂 彼此亦有沮喪 童話書從成長中難免要學會失望」,人生就是如此,有得必有失,放鬆啲啦香港人;歌詞越嗒越有味,從多方面叫本人想起巨基的《花灑》,又或是劉華一系列人生道理綠茶歌,但《笑忘書》就沉重一點,不過個名好型。

另外一杯是《騷靈情歌》,騷味十足(雖然我唔係太熟騷靈音樂,哈哈),和另一首《第二次愛你》一樣有種感性又性感的感覺;詞中提及黑人、紐約叫本人不禁想起之前胡琳一首《自由像你》,咩家陣興紐約咩?﹗另外一首《兩坐位跑車》intro有點百老匯feel,個人點(可能無人會明)的說法是很堂本光一《Shock》歌曲intro,哈哈,可能真無人明,不過輕輕快快的聽得好舒服。這幾首歌都聽得出歌者刻意放輕聲線,不知何解出來感覺極似陳曉東…真係好似…

《遇見神》很宗教意味,和之前一首《Blessing》有無咩關係?《遇見神》曲式和歌詞較易消化,聽完有種暖暖的感覺。未知歌者是否個虔誠的教徒,除了這首,其他歌(如《騷靈情歌》)常出現一些神、見證、虔誠呢啲term,幾有宗教味道…。

未聽《從何唱起》真想不到倫永亮和張敬軒兩代唱作人會合作,歌中講他們對音樂的喜愛和堅持可算是他們的自白?﹗亦有勵志的感覺。

隨碟附送PV碟乙隻,感覺…《無需要太多》啦…太多我食唔落…

但唔知呢隻碟可以霸我部機幾耐,因為我等緊王菀之(嘻嘻)隻新碟,《詩情》又《畫意》,正呢…

另外的:
張敬hins《感情.生活》~80年代情意結
Urban Emotions~張敬hins

8 則留言:

  1. 這張碟都ok好聽的。

    6th Nov 2006 13:54 PM

    回覆刪除
    回覆
    1. 真係唔錯…哈哈

      7th Nov 2006 17:09 PM

      刪除
  2. 笑忘書好似係森美小儀既big nose既歌,好似係小儀唱ga~我未聽過佢隻碟呢~不過覺得隻歌都幾好聽~^^

    *其實到而家我都分唔到張敬軒同張繼聰呢~


    6th Nov 2006 17:58 PM

    回覆刪除
    回覆
    1. 係?﹗我無留意森美小儀的音樂劇唔知呀…
      哈哈,上面有張敬軒的嘜頭…唔係上面個樣嗰個就係張繼聰lor~

      7th Nov 2006 17:12 PM

      刪除
  3. 同妳一樣,近來都聽到有不少人對這本笑忘書的好評,都心郁郁想買回來欣賞欣賞。。。

    我只係聽過「老了十歲」(係現場聽張生live!)、「笑忘書」、與及「無需要太多」。當然印象最深刻的是「笑忘書」,張敬軒的歌聲感染力很強,而且聲線好「乾淨」好靚,一直都覺得他在香港不受重視,或因受到市場阻礙,及皮球唱片差勁的資源投放策略(錢都用光在黃伊玟、eo2等身上),一直都很替張先生不值,懷才難遇。

    「笑忘書」是經典名著書名,其實林夕一早已經用過這個名為王菲寫詞。今次換上夕爺徒弟林若寧來寫,效果都不錯。不過可能林若寧太崇拜林夕的關係,令其作品都帶點second-hand的感覺,好像「悲歌之王」就是最典型的例子。個人覺得似乎還要點時間來磨練出火候及個人風格。

    6th Nov 2006 21:58 PM

    回覆刪除
    回覆
    1. 皮球的捧人政策很怪,想當年克人港樂都係倫伯拍心口擔保銷量一定ok先有得出…
      黃伊汶其實都ok既,不過又係捧到有頭無尾,而家無晒聲氣…
      新一代係要比啲時間磨練吓既,笑忘書出呢效果都唔錯呀,係本人近期熱播金曲~~哈哈

      7th Nov 2006 17:14 PM

      刪除
  4. 先拉下关系先,轩仔系我中学同学,不过以家无乜联络。
    成张碟最中意既系笑忘书,其它就感觉嘛嘛。餘震虽然稳左潘源良来填词,但系我觉得呢首歌距同老了十歲一樣,好K。

    6th Nov 2006 22:06 PM

    回覆刪除
    回覆
    1. 咦,同班同學?﹗好有緣喎(我無咩明星同學的說…)
      餘/老兩首大路作都唔係本人的心水,我最喜歡都係笑忘書,另外騷靈情歌和第二次愛你都好不俗。不過本人心水通常都唔會plug上台,睇吓下一plug會唔會係笑忘書

      7th Nov 2006 17:16 PM

      刪除

要講幾句嗎?﹗XD