90年代情意結之造型篇

呢張相搵得我幾辛苦呀﹗

事情是這樣的，話說無事中開電視睇到《康熙來了》，小s笑小豬當年的金毛造型很台客(我諗即係我們說的MK吧？)，小豬即說：「當年誰沒金毛過﹗」(轉數很快﹗小s都被串到口啞啞的說…)…嘩嘩嘩…這句很中﹗﹗﹗我睇到大笑了…

我試著想…究竟好地地做乜會恨去染金毛呢？我諗源起係呢位鄭大姐…當年曾號稱「金毛強」。

(說起來80年代東東我都係90年代接觸番，說實在80年代時真係細，唔太記得了。反之諗番90年代的就歷歷在目得多，尤如昨日般近呢﹗…我…在扮細…哈哈哈…)

呢張相真正，一次過滿足我最想搵的90年代女星常作造型：金毛+長裙+波鞋。

其實染咗係咪靚啲呢？實在係相當MK的。但回想鄭天后初 冒起時，喂…佢之前係美少女，斯斯文文的(不過我最記得係《火熱動感LA LA LA》佢既一句「誰願做冷艷派」)，某天突然變身造金毛強，那一野係相當SHOCK吓，之但係佢一系列快歌《Chotto等等》、《大報復》、《十誡》和 《癲don》(這首是重點…點解讀到變咗癲？)都相當入腦，學校的友儕個個都當佢神咁拜，影沙龍相(這也是很90年代的事物﹗﹗﹗而家好多人都貼番上面書 度…得．啖．笑…)都係鄭天后造型上身，仲特登去染個靚髮…但轉頭要返學喎？咁…就只有兩個選擇，一係即刻染番黑佢，一係買支野噴黑佢。吾校當年是捉得相當嚴的，我甚至懷疑早會的原因係俾老師足夠時間去捉校服和髮型不合格的同學…囧…

不過鄭天后變金毛強的時候我等還小，而市面都沒太多DIY染髮工具，除非屋企free到暈，要不係唔敢挑戰學校，還是做番黑髮小寶寶。直至過幾年安室奈美惠冒起(其實也不只她，97、98年很多日星在港超紅…突然地…)，那時外在因素都成熟啦(即是說年級高了點…市面上的美髮用品也齊全了…)，開學後通常都會有啲未完全執好個返學樣的人…。我想話，學校越禁就越想做，不過…又真係無理由尤得啲學生一個二個個頭五顏六色咁返學既…

我很乖，我可是a level study leave先開始攪到個頭鬼五馬六的，放榜返去拎cert時好在不用著校服…哈哈…

好記得九字中期左右成日見啲女星著長裙/褲，一係半截，一係工人款，工人呢就一係牛仔工人裙/褲型的，一係吊帶，內襯tee乙件，但其實咁長我成日覺得好熱…，然後襯的鞋呢，一係就如上圖鄭天后的厚底波鞋(我好記得一款C字係勁hit…除了鄭天后，王菲和李惠敏都常著的)， 一係就如左圖港姐們著的涼鞋，一係呢就包到hum得穿入去個位和鞋頭係窿，都唔多涼；一係就如圖中右下角那位姐姐那種鬆糕鞋，唔知點解一定係扮藤織的水松底。前者，即係密不透風的那種仲有種變奏，我娘稱之為「豬肉榮」的鞋，又真係有幾分似的…

講起港姐仲有呢篇：舊時啲雜誌2~港姐篇

出賣吓人又出賣吓自己…當年很流行的工人褲…啦啦啦，個美少女係咪真係好得人驚呢？還有個body shop袋﹗很環保﹗不過當然志不在此，其實係扮型。記得當年除了這個還有3spirit，除了側揹的仲有索繩的背袋，幾十蚊個lur媽媽買下來，方便自己扮型~

話說回頭，當年很多野都係牛仔的，工人褲不在話下，工人裙也少不得(我記得安室99年上紅白就係著牛仔裙的…)，仲有牛仔裇衫，這也是扮勁必備的item，男男女女都要有深淺色格仔淨色幾件傍身的。睇番舊相…囧…好多﹗


搵相的時候忽然諗起呢個牌子：Boy London。記得有一水街上有很多呢個牌子的錶既老翻，而且仲翻得幾精美…umumumumum。在小的識去買swatch之前，係戴過那些老翻野一陣子的，唉呀，年少無知年少無知呀(但老翻得來…係幾靚的…囧)

早陣子寫過篇《今天的潮明天的娘》…寫道「他朝回看現在相片…我想也不會有太大反應吧？反正本人品味也不見特奇特…umum…」…死啦…就算係娘造型都唔多頂得順喎…囧…(幾好笑就真既其實)

還是應該慶幸沒作出「金毛+長裙+波鞋」的造型呢？﹗
*****************************************************
搵相過程無意中搵到的一：

98年的古先生~那水很時興的著鞋唔著襪(老土兼核突…還是大方兼老實呢？)，但本人唔多頂得順。不過呢篇野我最有印象係內文寫話古生說自己係海豚…鐘意俾人讚…(我都係喎…讚我啦﹗讚我啦…)

原來海豚係疑似天秤座動物來的…umum





*****************************************************
搵相過程無意中搵到的二：

 96年的laughing哥…呀…唔係…應該係大天二至啱…umum