2012/06/25

迷子遊馬交…

藍天與白雲﹗噢耶﹗~生日這天選擇出走,避開網路(不過…有政府wifi還是會上的…)和電話,只係走走看看,好爽﹗

話實,是次係特登避開之前的蒲點,挑啲suppose係最景點的景點來看…卒之行到雙腳發麻和十年加埋咁多的汗囉… 

唔係講笑,雖然小的經常去馬交…但除了新馬路一帶外其實我唔識路的﹗…雖然拎住張地圖(經過上次弘大的教訓今之我印了幾個version出嚟啦,又cap定openrice啲地圖喺手提﹗哈哈哈)…不過…在下環還是在甚麼鹽里甚麼的兜了幾次都出唔番去…經過同一家東望洋餅店兩次…囧…

um…喺新馬路轉上去見到的第一個景點…呃…個名好難記,應該是甚麼聖老楞佐堂…(即係講完我都唔會記得個名…)


行行吓行咗去甚麼南灣大馬路,這個是馬交的中聯辦?話實呢,路經好多政府機關啲building都係古色古香的葡式建築…遠遠望到旅遊塔…其實有一刻我好想去看看…入面開咗玩具反斗城呀﹗(<<<癡線架呢個人…)

 發現無聊事是我的特色…跟景點合照也是我的特色…哈哈哈…

馬交的名師呀﹗個樣都幾四正丫…um,娘成日有意無意講笑咁話不如過馬交住,今日一行…有條街街頭到街尾有4間琴行﹗咁小的可以繼續學習啦喎﹗呃…哈哈…講笑的啦…繼續行…

這個甚麼阿婆井前地…是有井的嗎?(真係枉為由細去到馬交大的人…我竟然從來未聽過有這樣一個地方…),呀…呢個街名牌呢,我成日都話想買塊十月初五街返屋企貼的…寧願沒擁抱共你~~~可到老…(<<<又癡咗線…)隔離這個…是無聊的…我想問有明珠咁有無jade呢?

主教山…無疑我身子真係差…行上嚟行到索晒氣…呀﹗啲路使唔使咁斜呀﹗吼…(但個天真係藍得巧令令…) 
來多幅俯瞰圖(是這樣叫的嗎?)…行番落去時沿路風景有點像淺水灣啲屋仔(我有無講我另一嗜好係搭小巴去赤柱睇風景?),成條路人影無個車又唔多…打橫行都得啊…

下個景點去成日見到巴士寫住的媽閣,我唔記得有無去過了(主教山是記得有的…去親友婚禮時…)…路經這個…屠場…夜晚會唔會鬧鬼呢其實…個樣好恐怖…
海星和嶺南香港都有喎…但典解左邊海星中學這個作品會用埃及人嚟叫人清潔馬交呢?創意無限真係不再平凡…

我真係行到去先知…媽閣…係…廟來的…囧(究竟以前在馬交做過啲咩?可以咁唔知啲景點係乜既?)
太熱關係沒胃口食飯(也因為朝早個老麥早餐頂住頂住),見到有雪糕車就經廟門而不及去吃這個有點複雜的雪糕,看起來是幾隻味溝埋了?盛惠10蚊…

萬里長城真係一條街嚟架喎﹗好爆炸…咁住喺度既人係咪友誼都會比它長呢?(其實…馬交好似有條友誼馬路的說)

一堆隨影,左邊這個好似係甚麼海防甚麼署定甚麼館來的…右邊這個純粹覺得幾moody咁囉… 

鄭家大宅,而我也不知道是甚麼來的,有就入去看看。有點景賢里+九龍城公園的感覺。但這不是重點,重點是門口的哥哥會問你乜國籍做統計,跟住我行過時佢ell我啦…佢講野又細聲喎(咁我聽緊歌既又)…,完全唔知佢up乜之下…我吓了一聲…佢就揚手叫我走了…哈哈哈﹗佢會以為我是外國人嗎?XDDDDDD

 我鐘意呢個囧字POSTER,與時並進到不行…

甚麼榮祿大夫的居所呀?是慈禧太后識那個榮祿嗎?

又說,馬交碼頭和機場都中英日韓的對照,但街頭啲介紹就只有日文而無韓文…嬴咗﹗勁過…(很無聊)
睇完想閃…經過見到…昌輝﹗即時諗起香港…喺北角…都有昌輝﹗原來昌輝王子的影響力咁無遠弗界…

行行吓見到有抽住匙的電單車﹗也見到N年前郭城城賣廣告而大紅的電單車品牌…巧京京喎﹗

潘榮記而家幾多人幫襯﹗我想買盒金錢餅都唔得啦…嗚…

btw,終於從那個甚麼下環的甚麼走兩遍(無迷失東幕路咁慘情了)回到草堆街(我媽對呢頭的稱呼),感覺有如從火星回到地球…太好了…
大砲台我都去埋勁呀呢﹗(腳軟沒去大三巴啦)…呃…那個甚麼歷史博物館竟然星期一休館…嗚…


細個有吃過(吧?)禮記的雪糕三文治的…本來坐低想吃個公仔麵…但真係太熱唔想食野…卒之又食雪糕…UM,啲紅豆真係不賴…

 無呀,無聊的…他鄉遇老夫子好親切之嘛覺得…XDDDDD

走走看看是很開心的,吓吓出遠門會破產,偶然來個short trip亂咁行也不賴呀。不過真係唔適宜夏天去,馬交有冷氣的場所真係唔多(總不成山長水遠碌番落去新八百伴架﹗)…上年友人說去路環和乙水仔那個環龍葡韻又係熱到無朋友,成支水飲晒死手間也不用去那種呀﹗吼…

2 則留言:

  1. 澳門讀者26/6/12 22:07

    你到的景點都不會人山人海,但就沒有冷氣,有利必有弊,澳門商場不多,除了賭場有強勁的冷氣外,其他地方都要忍受酷熱的天氣了。

    推薦你到氹仔的龍環葡韻,那裏真的很優美,而且現在有一條行人電梯連接龍環葡韻和威尼斯人,即使行完龍環葡韻滿頭大汗也可到威尼斯人解暑。

    若要有冷氣,另一賭場也可以一去,MGM現在在室內花園裏設置了一個蝴蝶屋,那裏養了不同品種的蝴蝶,在蝴蝶屋內可與蝴蝶近距離接觸。

    回覆刪除
    回覆
    1. re:澳門讀者

      龍環葡韻上年去過了,因為本身有親友在澳門所以久不久都會去的,但發現其實我好少行旅遊景點和博物館,趁有一天假期就想去走走看看,淨係行澳門島都行了半天,出完一身汗都唔想再行了(笑),所以沒打算過氹仔(原來個氹字打到的…哈)…

      我唔鐘意入賭場,之前室內未禁煙時好似入咗煙艙咁陣味好勁,加之於除了拉老虎機我又無興趣睇人賭錢,啲商店賣野又貴…除了親友想去之外我都唔會入…咁,就唯有搵食店坐低先可以涼一涼冷氣囉…哈…

      刪除

要講幾句嗎?﹗XD