[韓劇]《仁醫》吐嘈之3(至12集)

本來睇到無乜心機，但既然開咗個頭不看白不看，唔爭在埋埋個尾佢啦，都已經出到第14集囉…

um，真不枉我說敬卓哥係最悲慘男二，佢個situation真係慘到無朋友…(而佢確係無咗個朋友…sorry，唔係有心食字gag的…XDDDD)

庶出、難得有永輝這樣一個兩班子弟肯同佢做朋友、又難得落難而可以和永來(前文寫英來不對了)結婚約、又又難得從事官事業上偶然難得可以得到父親認可…個setting本身已經慘，跟住唯一的朋友原來係亂黨之首，為得父親認可一定要親手捉到佢，跟住永來本來個心已經不在自己，被女方開口解除婚約之餘仲要同父親講係自己主動解除，之後阿妹睇住阿哥喺自己面前死去，我不殺伯仁伯仁卻因我而死，一定挽回唔番女一個心啦﹗仲慘的是劇情發展下去敬卓哥阿爸應該守唔住個權勢，阿卓哥為咗佢殺呢個殺那個卒之得個桔﹗真係慘絕人寰耶﹗

而左相大人同個長子真係好乞人憎，弄得我好想興宣君成功取得皇位…不過敬卓哥就慘，屋企人都無埋…囧﹗

喺永輝死咗之後竟然有一幕咁攪笑的BL情境…咪話阿敬卓一路暗戀永來的嘛，咁佢回想番洪氏一家仲未落難的時候，有次三人一齊去市集睇野，敬卓想借故拖永來的手，永輝發現就伸隻手埋去俾敬卓拖，敬卓唔知情之下仲話乜你隻手咁粗糙…笑死我了﹗但那刻好朋友死掉係好悲情的其實…囧﹗

實在敬卓哥真係結合晒洪吉童的身世，然後昌輝王子的無間地獄人生(昌輝要親手殺亦敵亦友的洪吉童和最愛的利祿嘛…)…

***************這是對敬卓哥遭遇深表同情的分界線*********************

唔知呢，我對男一ラマさん真醫員(好啦，跟番字幕叫啦)好像有欠投入，我成日覺得佢雖然被興宣君拉入亂局，但佢個人對事勢既野好抽離咁…而，我又在研究無聊野了…究竟呢套劇總共有幾多場真醫員被敬卓哥訓示/恐嚇和降劍呢？







仲有呢幕係揼咗佢一野…哈哈哈…繼《洪武三十二…除》數人除衫之後我開始想數究竟有幾多呢啲場面…

仲有真醫員做手術前俾人打斷的場面﹗就算無人捉佢去打，都要有永來同佢理論呢個人值唔值得醫…真係好煩呀﹗

另外要數勁過的地方…男女主角都要「犧牲」色相整啲日版無既性感場面(借某博友相片一用)，我實在太難忘真醫員的大脾了﹗那個特寫令我震驚了﹗跟住到永來燒傷時佢啲水泡(肩膀之後仲有集係腳指公﹗仲要影埋流膿呀大佬)特寫令我十萬個不安…大囧﹗真係勁過﹗

最勁過莫過於日版和宮吃下有毒道安津令南方大夫入獄事件，那次咲係無被毒打甚麼的，南方大夫就慘啲被人打又被人盛(不過憑佢醫術竟然得到眾犯人信任了﹗…真係連坐監都唔放過地要熱血…)…泡版永來都被打到鮮血淋漓，又差啲受炮烙之刑(於是暈咗…原來左相係害死佢爸的人…咁佢娘知唔知？知道就無理由仲同仇人之子訂婚約丫？)…大囧﹗果真是勁過…

btw，和宮係皇女/公主兼將軍正室啫，泡版係大妃娘娘，又勁過了﹗(不過佢係咪有腳氣病？定係純粹鐘意食甜吃？)呢一段呢，係講榮夫人知就甜甜圈係女兒做的，口硬心軟之下吃了，間接接受女兒從醫的嘛，暗暗有一個感動位的…。但泡版的甜甜圈只係輕輕帶過，阿娘話吃就吃了，直接轉入大妃娘娘的壽宴，殺掉了一個好感動的親情位耶﹗

睇睇吓，主線竟然從真醫員的醫術變成興宣君成王之路，見佢同永輝及春紅(妓生都是殺手？﹗定春紅都係未來穿越到古代的人？做乜佢乜都知﹗係咪我飛得太快miss咗啲野？)商討大事時我以為我睇緊《洪吉童》…囧…又是一個未來的王+亂黨的合作嘛…呃…

如果唔硬將之和日版比較，咁國情唔同內容自不然要將就一吓…除了啲手術好特寫(那個肉瘤真係拎一pat肉出嚟囉﹗大囧)…我諗我找到笑看點，可以支持到完場了…

重點是，唔好同日版比…以上。

[日/韓劇]兩版《仁醫》
[韓劇]《仁醫》之忍不住要說兩咀…
[韓劇]《DR.JIN》結局貼圖文…