孖仔孖心肝/淘氣雙子星
周星星啲劇我較有印象是《他來自江湖》和《孖仔孖心肝》，《蓋世豪俠》其實…是唔太記得/鐘意的。呃，《他》呢，我又只記得金水(一度令我以為金水係正音﹗)聽大哥大不停喂…喂…喂…呀，有萬子哥囉，呢套無so what啲咁浮誇(睇開佢啲肉緊作風，《胭脂扣》時令我一度不能linkup收留如花的人就是萬子﹗)。
《孖仔孖心肝》呢，自我有生以來我都expect孖生的人應該似樣，我點睇都睇唔出周星星和劉青雲係孖生，then《淘氣雙子星》的李克人和黃阿Paul係孖生，甚至係《廟街孖兄弟》的娘丙和李克人係孖生囉﹗anyway，《孖》劇係我久不久會重溫的…太鐘意阿細啲加菲貓TEE(我曾經好鐘意加菲的…而我細個除了買Barbie，另一個會扭大人買的公仔就係加菲了)、背脊那個觀音紋身(成個背脊都係喎﹗)同埋梁家仁的阿爸，佢同阿細啲互動好好笑…咁梁家仁一路睇開佢做郭靖、喬峰啲大俠野，原來做縮骨小人物都OK喎(但最近睇微博先知，原來轉演喜劇係無可奈何的說…噢…)
呀，其實我仲好鐘意家仁哥喺《闔府統請》做喜爺阿爸的說…
Sorry，我完全無視了劉青雲…同埋陳秀雯條感情線…哈哈哈﹗
《淘氣雙子星》呢，我懷疑是睇睇埋呢套和《浪族闊少爺》，睇得多所以聽李克人歌都聽到入晒腦(而我的確儲番好多寶記舊歌…)。跟住又因為睇睇埋《Beyond放暑假》而令我一度以為Beyond係偶像組合(我怕家駒哥會激到嘔血…)呃，咁《淘》真係好偶像架嘛，咁《壹號皇庭》兄妹有江承宇和江承宙，《淘》有查星宇和查星宙，friend嚟的嗎？呢set名我覺得好有氣勢好型的說。如果我無記錯，《逝去日子》是主題曲(or插曲？)
大家族
其實我是超熱愛主題曲《改變常改變》喎﹗我口味是偏鋒的，除了這首，Uncle George另一首我熱聽的就是《緝私群英》的主題曲，前者係好多精選碟都有，而後者就尋遍不獲…我好唔開心…
這套應該是繼《他來自江湖》後另一套比較ok的萬子哥戲(呀，我頭號頂唔順的是《萬里長情》…哈)，呢套野佢個角色設定勁似《天地男兒》的秋官，都是大家族(﹗)中的男丁，但因為係私生/娘親不受寵關係而被排除在外，跟住呢個家族硬係做啲大企業(仲要兩套都係銀行﹗)，之後會有個大家長(都係蝦叔﹗)…是會死的…引發爭產/家族沒落，然後呢個被排除在外的男丁本身和家族的人不和，當中會有一個跟佢friend的(《大》有劉錫明，萬子阿叔，《天》有潘志文，秋官阿哥定細佬？)，但呢兩個角色都係要死的﹗呀，劉鍚明演的細叔心臟病發死時我勁唔開心呀﹗呀，then因為好人死掉奸人(曾江﹗)入侵，拯救呢個家族的就係呢個被排除在外的人了﹗~~~
我淨係記得劉鍚明的細叔要死(就說，其實當年睇劇劉係好ok架喎﹗)，睇番維基先記得二叔朱江都要死，仲要一開始死，剩下唔記得係未亡人定未婚妻的李美鳳(can’t let you gogo, can’t let you go~)，最後連大哥曾江都要死的個角色…好記得呢，明明阿爸(曾江)死咗，跟住阿仔(萬子)結婚好地地，跟住阿爸用把好陰沉的聲話佢第時都會心臟病死…巧京京囉﹗而阿仔最後係同李美鳳定恬妞結婚既呢？忘了…
呀﹗一大爆炸位是，看這劇我學識杯麵唔可以連埋塊紙擺微波爐的﹗
8、90年代啲家族劇呢小的prefer呢套或之後的《天地豪情》，大hit的《義不容情》、《大時代》呀咁我反而麻麻地…sorry，是我口味怪…
都市的童話
又是主題曲的錯，鐘意呢套劇有一半是因為黎老闆的《傻癡癡》…
林文龍和朱茵是男女主角我記得，不過我更記得是演沙樂美的關寶慧呀﹗連埋《大頭綠衣》的紅衣女鬼，我認定了佢係奸既，於是看《射鵰》我睇唔慣佢做好人穆念慈，睇《闔府統請》佢做會計乖乖女也看不慣…oh，係我錯…哈。
*********************************************
就算小的熱愛睇紀律部隊/專業人士劇嘛，幾乎睇親就幻想自己做呢個行業(當然，是得個講字既)，來總結一吓小的飛佛：
壹號皇庭/真相
《皇庭》好似單元年代比較好睇，第4和5輯加了好多又煩又盛的感情線(雖然頭幾輯都有)，好煩。呀，一轉頭去到《真相》時竟然又嚟番案情行先感情線行後，甚至整條open-end的感情結局，又估佢唔到…睇得我如癡如醉呀﹗(上年《怒火街頭》ssp law霸都好爆的，但新一輯似乎力有不繼)
前幾年的《律政新人王》和n年前的《第三類法庭》印象告訴我是不錯的，不過我唔記得detail了…
刑事偵緝檔案/離島特警/ CIB情報科
除了律師，看警察劇我都有幻想吓的，不過我體能差，沒機會考上的了…
《刑偵》是《皇庭》之後另一套由頭睇到尾，也不開心後來的越整越多感情線，變了談情說案囉(笑)((又說，第4輯太嚇人了﹗)then《離島特警》其實我最鐘意的是主題曲《多一點》(陳醫生的)，我懷疑陳醫生是繼uncle George之後另一個主題曲都好好聽的人…可惜無以為繼啫。《CIB》是後來睇番，幾鐘意佢成日片嚟片去的鏡頭，伍姑娘和邵美琪雜誌社的角力，邵美琪幾個阿媽(﹗)好爆…反而CIB攞料的部份嘛，最記得係O記(唔知泳漢定泳豪跟徐榮的，如果我無記錯)次次都爆/踢門跟住碌入現場捉人囉﹗
呀﹗很重要，呢套難得地做家務的係菲姐姐，唔係馬姐或阿媽﹗(終於貼近現實了？)
緝私群英/雷霆第一關
咁啱海關都係喜爺演的？看舊文吧不重覆了。想說的是，《緝私群英》劇本比較大路小品大團圓(有小環啊﹗)，《雷霆第一關》就大製作(加入我最驚的複雜感情線了)((想))有深度和疑似有伏筆for續集，但，阿姐和李修賢條感情線其實巧京京…(阿姐和梁琤一齊有bb我真係巧京京囉﹗)((其實阿姐阿爸阿媽的感情線都好煩人的…))(((而宣萱的我很正義我咁煩都係為你好式的角色喺呢套係煩到極點…我好懷念《皇庭》爽朗的阿Sam)))，尾段的臥底部份越講越沉重，再聽埋《戀愛是個海》就好sad，雖然整體可能《雷》係完整啲，不過我都係鐘意《緝》啲開心大團圓…
一睇再睇都係回味：[港劇]20年自high系列~《緝私群英》
烈火雄心
都係喜爺，不過喜歡看的只係第一和第二輯，第三輯視帝和囧好煩，見到就憎，完。
仁心解碼
醫療劇應該係《妙手仁心》比較經典？但我喜歡《仁心解碼》多啲啊，精神科比較少有嘛(多數都係急症室…)，資料搜集都幾認真，難得有齊二少和17皇兄(我後尾先知原來其中一個實習生係佢﹗)太爆炸了…而方中sir成日扮神探加俚略，也比《談情說案》有趣得多…難得地除紙山是極順眼…
前陣子發現呢套戲拍續集，不過人腳大改囉﹗囧﹗希望keep得住水準啦…
********************************************
在改改打打打打又改改之下終於寫完呢五篇了…巧簡棟。但話晒小的可是由細煲電視煲到大，其實很多以前很沉迷的太耐無睇已經唔記得，有些經典但時機未到而無睇，而我記得我好鐘意的就不停回帶…哈哈哈﹗
全集：
[港劇]最喜愛的回顧~1~《人在邊緣》 / 《今生無悔》
[港劇]最喜愛的回顧~2~古裝片(武俠片類)
[港劇]最喜愛的回顧~3~古裝片(非武俠劇類)
[港劇]最喜愛的回顧~4~民初劇類
全集：
[港劇]最喜愛的回顧~1~《人在邊緣》 / 《今生無悔》
[港劇]最喜愛的回顧~2~古裝片(武俠片類)
[港劇]最喜愛的回顧~3~古裝片(非武俠劇類)
[港劇]最喜愛的回顧~4~民初劇類
沒有留言:
張貼留言
要講幾句嗎？﹗XD