[日劇]《遅咲きのヒマワリ》(1-3)…勵志劇都係咁上吓？(暨回顧)

看我幾俾面﹗百忙之中都追番一吓斗真新劇啊﹗呃，見到排頭係斗真和真木陽子…點呀…又嚟《源氏物語》…um，我想話呢，阿陽子姐姐在電影或呢套劇的poster裡個造型都靚好多，點解劇入面梳個同頭盔無異的髮型？弄得佢好老啊﹗(其實我一路都認唔到佢乜樣的…打從遠古的《SP》開始…)

第一集感覺ok，不過唔知我追得幾多集呢？

19/11/12：看了3集lu…

即是說，之前山p的《最完美的人生乜乜乜乜》和麻生同學套《偶像爸爸》都爛尾了…哈哈…睇番先知原來斗真上一套劇已經係兩年前的《花癡刑警》，主演的話已經係3年前的《魔女裁判》(time flies﹗)可能佢keep住不停有電影上，完全唔覺咁耐啦喎﹗

即係咁，見有斗真同學嘛，咁7個年輕人茫茫然對人生不知如何是好之後又攪一大輪then搵到人生方向，呢種劇我係頗喜歡的(年輕…呃…哈哈…不過對人生不知如何是好就好難唔對號入座既…)…從遠古的《白線流》到近期的《飛特族買個家》(這部其實是爛咗尾…)…都會不其然走去看一看，即係呢，我喜歡呢輕輕鬆鬆一個鐘然後又懶正面唔係吓吓喊苦喊忽既劇咁…

派遣族愛情事業雙失後去到一個新地方重新開始，本來諗住hea hea的，點知遇到不同的人和事後就重新發現自己人生和夢想，是多麼的大路(老土？)啊﹗可能香港唔似日本咁多派遣/飛特族文化(多年前寫過一篇…又是一個n年前了﹗)，但現實逼人是一樣的，初初出嚟做野可以唔理將來求求其其，但人慢慢長大就好多現實問題逼埋身，講夢想可能太遠了，但人總得有些目標嘛，咁想做和應該做的又是乜呢？好危險，呢啲劇好易對號入座的…

um，so far得一集咁故仔又好大路(見此)，我的期待就是…開開心心一集咁囉，《信義》和《善良的男人》唔係死人就係la口la面，突然轉番channel睇吓日劇好refresh吓，um，呢一季我對香取和山p的那套都有興趣的啊﹗

好唔好睇要睇多幾集先知啦，想講的是…四萬十讓我想起《歌姬》啊﹗長瀨個角色就係叫四萬十太郎的說﹗

後感後補…其實我是想講吓讓我聯想到的青春勵志劇呀﹗哈哈哈﹗
*******************************************************************
19/11/12後按：

看了3集，套劇其實很公式，有個失意人去了一個新的地方，佢跟那個地方的人都不一樣，那個人影響了當地人，而當地人又為佢的人生觀帶來了新衝激。每集就係發生一件事(其實跟刑警劇一樣囉﹗)，從發生到解決end up那個人和當地人之間會互相加深了解，then大家對人生又有新體會咁…

十分之公式﹗(也十分像《飛特族》﹗)，內容也有點平淡(沒有《瑠璃之島》的溫心)，如果唔係主角係生田斗真我應該唔會睇啦。雖然第3集講到被需要是有一點感動…呀，我仲未開工睇第4集…有爛尾危機﹗XD
*******************************************************************
《白線流》

呢套好勁，一個又一個special從主角高中畢業到出嚟做野足足10年，雖然我係近年先一次過睇番，本來只為看長瀨智也和柏原崇的，但睇得好有共鳴。另一個大發現是主題曲Spitz 的《空も飛べるはず》，尤其喜歡一句「君と出会った奇跡が この胸にあふれてる」…能夠有班知心好友從學校走到社會，是很難能可貴的…(呀，所以我鐘意睇《回答吧，1997》了？﹗)

《Orange Days》/《夢想加州》
SORRY，呢兩套是有睇但都唔記得劇情了，《橙色日子》我印象是覺得很《愛情白皮書》(但我是先看台版再看日版…哈哈哈)，《夢想加州》我記得堂本剛是演個三四流大學生，對未來充滿無奈，看的時候睇到對晒號，好唔開心的…套野都好似頗灰調的說…

《瑠璃の島》

看《遲開的向日葵》劇情我覺得是《瑠璃之島》+《飛特族，買個家》的混合體囉，唔同既係主人翁設定比較似後者(《瑠璃》是竹野內豐的獨腳戲了…)，似樣的是大家都離開繁華大城市，去到山長水遠的地方取景，啲風境靚到好似旅遊特輯咁，好勁﹗劇情又是經歷失意後去到一個新地方(通常都係無意的)，當地的人和事令主角重新振作，搵番人生目標咁，日式熱血劇都係咁上吓囉呵﹗

另，首主題曲真係好好好好好好好聽﹗好溫心的。

《蜂蜜四葉草》
呢套又係大學生的青春物語，由頭悶到尾咁濟，純粹為追斗真一條龍而睇。但詭異的對斗真那條線：茫然不知不如是好的大學生異常地看得投入，雖然我無好似佢咁去個單車旅行…囧﹗

又說，又是一首好好好好好好聽的主題曲，堅叔好野﹗

《飛特族、買個家》
感覺呢套同《遲開的向日葵》係勁似，又是一個無目標的人求其轉到一份新工，遇上好有目標的女角(而呢個女角咁啱係姐姐FEEL，而又係剛市上挫折)，以《飛特族》的劇情而言，應該可以估到《遲開》男女一應該係初頭互相唔妥對方慢慢相處之下就互相發現對方的長處之後愛上但又遇上時機成熟要回到各自本來的崗位了？﹗呀﹗我真係應該做編劇呀﹗

但《飛特族》我只看了一半，雖然二宮和也的劇通常我都會追，但不知何解呢套無乜心機追…也許我不太喜歡香里奈吧…