2013/05/21

巡視業務之二~書店路線圖

之前小的行得最多既係老銅商務+sogo後面兩三家樓上書店+sogo十一樓的旭屋(誰叫Himawari搬到無雷公咁遠﹗),誠品開店後就…哈哈哈﹗於是,路線圖是根據誠品分佈而定的…

呀﹗這都是一篇「讀書報告」的說。

基本上小的是有閒情就會入書店逛,隨出沒地點而定,商大年代行得最多咪第一頁,一落white zone(﹗﹗﹗哈哈哈﹗﹗﹗)就係嘛,走堂或等上堂時蒲點,同埋當年佢喺時代廣場的分號位處地庫,唔似而家要上九樓咁辛苦(這是史前年代咁耐之前的事了﹗),係,係辛苦,你知道就算開通了兩條直上的電梯都係解決唔到如滾滾長江般的人流﹗um,同埋本身我個人唔係好design…第一頁的標價也有點貴…而太多無聊有趣的東西會讓人作出不理智的行為…囧

咁其他的三聯、天地呀無特別preference,除了樓上書店入得最多應該係商務,呀,某次見佢網頁招募會員就興奮的走去買夠五百蚊,點知網上訂書唔計要入分號現兜兜買喎﹗我囧了…

唔,講回路線…

十樓
語文 

通常我都係搭神秘小lift上九樓,先上十樓或落八樓再行落去或行上去,通常會喺十樓行番落去,新書種類不確定係類啱心水嘛。而一上到十樓通常直鏟入語文個角落,不過又通常無乜野買,因為我唔想再買快快樂樂學泡文四十音或日本人一定會講的八十句了…XD

文具/商管
行入或行出語文角落時會經商管類書,但比起商大年代對呢類書熱情冷卻了,首先我成日亂咁買野已證明我不懂投資(XD),而甚麼甚麼成功之道…天時地利人和既野有一樣唔夾就算同一個Steve Jobs都未必可以再創蛇果神話啦,而那些甚麼我廿歲應該知道的幾廿樣事情…呃,我過咗廿歲啦…但四十歲退休之道我唔覺我會成功喎﹗咁唯有揭一萬樣老細不會講俾你聽的事了?

卒之…我買了《AKB48的格子裙經濟學》(不過未睇)…果然是跟娛樂界有關的我說會有興趣…XD

旅遊 
因為年初出遊於是由上年年尾開始係咁貢喺電梯旁到茶店門口的幾個書櫃睇日本/東京的書,呀,小的真的不甚喜歡甚麼旅遊王甚麼攻略,雖然資料是包羅萬有,但出門時帶在身上揹到膊頭勁痛呢,反倒是刨緊隔離啲遊記,um,或許,將每本睇到有趣的景點mark低自己做一本notes隨身袋了?﹗

呀,這都不是重點,重點是旅遊corner喺茶檔對面,個茶檔永遠有十萬個人買茶…加埋旅遊書又永遠有十萬個人…多人到想嘔﹗

九樓
日本/本地/東南亞(?)文化 

卒之俾我見到《下流文化》了﹗(雖然《M型社會》我都未睇﹗)之後又俾我發現有本新井一二三,但詭異地得日文那本,其他的新井書係喺小說那邊喎﹗詭異到不能。

而…其實小的係不停喺呢個CORNER度發現泡國文化相關的書…

有時見到梁文道、湯禎兆有新書揭完內容又好像不錯,但自我連環買了duplicate的書後…都係返屋企確認吓有無買過先…真係囧爆…也是同一原因,到而家我都未買近兩三年的KK Concert DVD,次次都話返屋企望吓,但返屋企就會唔記得望,再去影碟舖時望住有台灣版時又唔敢買住…囧(其實我睇完都唔記得內容…呀﹗我是熱情冷卻了?)

歷史
新研究項目是日本史…係,係日本史,其實小的當年會/高考只係由德川幕府末期開始讀,之前的都不太了解,呢期睇《信長的廚師》時,織田信長、豐臣秀吉呀那些名係成日聽但就唔知係邊個時期,好奇查了一吓先知…咦﹗德川家康都係呢水架喎﹗搵吓啲日本史一本通的睇,啊,原來戰國就係德川幕府之前的,真係長見識了。

旅行文學
繼新井一二三後,舒國治係另一個新target,佢本《台北小吃札記》買(看)了很久,呢水先睇番《門外漢的京都》和《理想的下午》,幾喜歡佢既行文風格,有啲生活小事跟小的一樣看到忍不住會心微笑(就如鹿島茂一樣,不過不怎樣見到佢其他書,看來要趁去日本時貢書店搵吓,個list會好長﹗)。

跟住而家睇緊松浦彌太郎,佢做編輯的《暮しの手帖》我有無睇過呢?(一個謎)我是從《日々の100》開始睇,呢本講佢生活上最鐘愛的一百樣小物(咦,呢個topic可以抄﹗),跟住再睇《自在的旅行》(好多((舊))書店和咖啡店見聞)和《旅行的所在》(有啲小說feel),有啲有字有相,有啲係齋相,但有趣的是文字生動跳脫的時候就算無相都有很大的想像空間,就算我本身討厭法國(美國),看完巴黎(舊金山)的文後竟然也有一吓響往…哈﹗(呀,佢在中目黑有家書店,我係咪要去朝聖一吓?)

呢個corner有點跟十樓的旅行角落互補不足,都是有趣的。但旅行文學如果有講座就入唔到去的說…囧

小說
除了金庸和好些睇完戲/劇有興趣睇番原著的小說之外,其實我好少睇小說的,因為新井一二三的書好少見日本版,唯有掃中文版啦,其他的作家,可以的話都想搵番英文/日文原版,真的,台灣中文版唔係唔好,就係好重好厚,都明明無圖架啦…仲可以大本成咁,袋住又係揹得好辛苦。都係英文/日文文庫本好,英文商管的書可能要等一吓先有袋裝本,小說就通常一出就係袋裝,不過我又少買(剛剛入了《大亨小傳》的囉)…但日文書…um…都係要去番Sogo捱佢貴到不能的匯率了…

八樓
新書 

新書就係新書啦,同埋會有該期主題選書的擺檔,又係好危險,明明以為行完一圈無乜收獲時就會喺呢度搵到啲野可以掃,同埋Habitu喺呢層,有好大買完野想去食吓野的危險…
****************************
以上。

8 則留言:

  1. 通常我都係搭神秘小lift上九樓,先上十樓或落八樓再行落去或行上去,通常會喺十樓行番落去 +1

    o個架lift真係超方便...又快又唔使點等...

    回覆刪除
    回覆
    1. re:Guy

      係囉,明明有部咁方便又唔使等的lift…點解仲有咁多人要等其他lift呢…上三四樓有快電梯…上11樓上以上經誠品都係行多一兩層啫…

      刪除
  2. 噢, 我去得不多, 所以還未知神秘小lift所在呢....
    AKB巿場學那本我打過書釘, 想買, 但因為我手上有兩本學日文的書...(我仍是日文初心者, 所以見到書都想買, 其他書店好似沒誠品咁齊, 金石堂運費加埋信用卡手續費又比較貴, 所以仍會在誠品敗)AKB那本諗緊好不好忍手到書展才買.

    回覆刪除
    回覆
    1. re:Saman Man

      是在落jason's(*$方向)電梯旁的幾部office lift,唔使等又快,真係好一流的說﹗
      我好鐘意買完先算…卒之堆了一大堆書在家未睇,所以今年其中一個努力目標就係清書﹗清完新買的再清以前堆落的…所以我狂出讀書報告文…哈哈哈﹗
      金石堂我未試過訂書,之前試過喺博客來訂dvd,加埋運費都唔係好貴,仲好快添﹗

      刪除
  3. 有你這類愛看書之人,書店就不用報苙啦,我只會打書釘和在圖書館借書,甚少買書的。

    《AKB48的格子裙經濟學》剛巧今天有人在報紙介紹,從經濟學角度解釋娛樂業,書名就較一般什麼炒股祕笈,某某成功人仕自傳有趣,看看圖書館遲些會不會入這書。

    另外我有位同事想在四十歲退休就從書店買了一堆炒股炒樓書來改善自己的投資方針,我都是那種不能在四十歲就退休的人,但有時聽聽他的書後分享都有得著,而且聽來又不致於太悶,至少透過生活例子(不是教科書上的理論)能對這個商業社會(我們生活的環境)之運作多一點了解。

    回覆刪除
    回覆
    1. re:五月

      哈哈哈﹗我支持之餘都要希慎支拎,誠品先有得繼續做架﹗我細個時好鐘意去圖書館借書,赤川次郎、衛斯理、金庸等都係借圖書館的,不過多數係學校的那個,公共的我嫌太污漕和太多加料,睇到我好驚﹗

      《akb》我有興趣呀﹗至於其他成功之道呀甚麼的我就無乜興趣,我覺得成功係一個偶然,要好多因素一齊組成先得,當故事睇就ok,要參巧當寶典就唔work囉…

      大學時讀商管嘛就好鐘意睇呢啲品牌成功之道,而家反而鐘意睇啲文化社會性多啲既書…哈

      刪除
  4. 還有我也不喜歡甚麼旅遊王甚麼攻略,我覺得那只是廣告雜誌,重點介紹的是飲飲食食和購物路線圖,一般實用資料就有欠詳細,而且去過數次自遊行後發覺網上爬文的資料還有用,製造自己的旅遊書更好,老實說,我也有參考你的遊記。

    回覆刪除
    回覆
    1. re:五月

      是嗎?﹗哈哈哈
      泡菜國遊記我好有心機寫,之前東京的我去的時候好有心機影相,心諗呢幅那幅可以點寫點寫,但返到嚟貼完晒食物相就無心機再寫了…嗚…有人俾反應我嗎嗎嗎嗎(講笑)
      um,那些甚麼攻略實用性較高的就ok,但太重了,同埋當人在異地可以上網,或者唔識搭車唔知點買時可以問人,不必帶太多資料在身,係帶定地圖和想去的店既地址咁囉…

      刪除

要講幾句嗎?﹗XD