2015/03/25

讀書報告2015#1~偶像研究

記一記最近睇過的偶像研究系書呀吓~

ジャニーズ魔法の泉―アイドルの掟〈2〉 (アイドルの掟 2)
就說小的鐘意研究J家嘛,咁作者上一本我都睇得咁開心時梗係睇埋第二本,梗係睇啦…但…首先,個封面令人好不好意思…是我最怕的彩色素描圖耶﹗在車上睇簡直…囧。第二是個內容,或者作者同喜爺接觸的時期比較遠古了(六、七十年代呀﹗)…講嚟講去都係初代去到鄉裕美叔叔時期的偶像…雖然我都有想話研究吓,但始終太遠古啦…

定係佢覺得八十年代以後的太不合佢河車所以都唔太理呢?呀,都有既,佢講了好多音樂劇的東東,是有講光一的《Endless Shock》和瀧澤歌舞伎的…但其實…都係講番フォーリーブス (Four Leaves)既囉…我鬼知咩…囧

感覺上呢本無第一本咁好睇…

増補版 松田聖子論
本來想再搵吓其他J家既書,但又搵唔到太多(睇評語說呢本麻麻地),click吓click吓就搵到這本講松田聖子的,話實我之前買了《松田聖子と中森明菜[増補版]》都未睇…咁呢本松田聖子的就當係先頭研習吧。

咁本書確係講了好多松田聖子出道前後偶像市道的情況,補充番點解佢七十年代尾八十年代頭一出就爆…呀係啦…因為食住了山口百惠引退的空隙,可能作者驚我地唔知山口百惠的歷史,於是就喪講…都唔緊要,因為我確係唔太清楚既…但都唔使清楚到逐首single介紹作曲作詞人和當中意境,和對當時帶來的影響吧?囧﹗我好似睇緊百惠自傳咁囉…

至於松田聖子姐姐部份…都有既…講番佢作為ブリっ子、聖子cut等風潮…但本書一半都去咗百惠度囉…仲可以有幾多講聖子姐呢…咁唯有期待睇番聖子姐跟明菜姐那本可以知番多啲啦…

アイドル国富論―聖子・明菜の時代からAKB・ももクロ時代までを解く
呢本真係informative好多,其實都唔止八十年代,連日活時期電影明星、七十年代南沙織等前山口百惠時代的偶像都介紹,連埋當時經濟和潮流等因素講番八十年代點解偶像風溯咁盛(泡沫經濟嘛﹗),到九十年代爆破後又變了偶像寒冰期興了美少女(因為大家對厭了浮誇的八十年代風味,想走番簡單純樸的…),到九十年代尾又無啦啦興番早安少女呢款純正路線既idol…再帶落去AKB和ももいろクローバーZ…學到好多新野﹗

當年我係講得簡化咗,聖子姐年代仲有非一般的藥師丸博子(女優idol)和小泉今日子,九十年代興起的安室和SPEED(走型格跳舞路線歌手…明明係有條件做美少女歌手的…)…

最有趣都係講到偶像元素要有的「育成」、「素人」、「參與」等因素令粉絲不停有誘因繼續追住偶像走,講了好多八十年代おニャン子クラブ(小貓俱樂部)快起快落,其實一路以來日本的偶像都興從完全的外行人開始入行,邊學邊做讓粉絲見證佢既成長,當然唱歌跳舞既野不能太差啦吓。咁小貓俱樂部係第一個一次過集合一大堆外行人組成偶像組合,大堆頭應該係史上首創,但快起快落很多都歸咎於太素了…兩年多後新鮮感就過。話說早安女孩的話事人つんく♂汲取了小貓的失敗原因,不停keep住加人減人(其實成個Hello Projector)等粉絲唔會覺得悶…雖然,而家個全新版我已經唔識了…

AKB更勁,原來秋元康當年有份參與小貓俱樂部架喎…換人加人呢啲野少不了,仲有埋地元表演場地等粉絲可以近距離接觸、投票選center等讓粉絲直接支持自己本命…好毒啊﹗

J家講了兩句啦,主打係話佢同寶塚一樣喺實習生年代先將素人育成聲色藝俱全,呢個JT模式被AKB、早安女孩完美運用了咁話喎﹗

基本上AKB和早安我都有研究吓,新既ももいろクローバーZ就唔太識…所以我決定之後挑一挑《大人がももクロにハマる理由》…好多書要睇呀﹗噢耶﹗

沒有留言:

張貼留言

要講幾句嗎?﹗XD