2011/01/28

[港劇]雜談無記處境劇

真係唔好意思…知道《依家有喜》已經拍畢(即播畢有期啦)我實在太高興了~

(謎之聲:我覺得這部《依》可說是我有生以來至頂不順的一套…囧)


七十三 (1973年至1976年)--我未出世﹗(哈哈哈…扮細是很緊要的),同埋都未聽過這部劇喎﹗據此網說此劇由白頭佬楚原主理,內容源自《七十二家房客》,oh…早期的處境劇都係是反映現況為主呢…(也說是說,近期的處境劇都不處境了,在一個既定空間有班人做緊啲現實裡難以想像地反智和滑稽的事…都莫講話共鳴,連看的勇氣都無了…呀…我又講《依家有喜》呢…哈哈)

香港81至香港86(1981年至1986年)--我沒看過﹗(扮細果然是很緊要的﹗),有印象銀禧小食店和順嫂,一路都和商台的《18樓c座》攪亂了啲角色,近期重播才知原來劇集是以商台廣播劇為藍本,本來想諷刺時弊的,但電視劇製作有難度,後來就轉咗去家庭溫馨野,亦典定了後來處境劇的模式了(我又想講現在的處境劇真的很難很…都係舊既好囉﹗)…(前陣子經典台重播才知,原來劉華都有客串過呢部劇的﹗囧)

城市故事 (1986年至1988年)-- 記得溫兆倫既表哥同埋何美婷既表妹,曾sir做阿爸,梁思浩做細佬…其餘就乜都唔記得了…(不知何解我記得佢地一家住沙田((看維基確定了…))當年我覺得佢地屋企樓下啲風景好如畫的~)(雖然溫表哥之後常演奸角…但暗地裡我還是最記得他演的表哥…)

都市方程式 (1988年)--完全沒印象﹗只是後來郭城城紅了有人提番起呢部劇先知劇入面句「烏龜戴眼鏡:泰山着絲襪」原來hit過吓的…囧﹗(也都是後來才知原來喺《淘氣雙子星》郭城城都有份的…呀…逝去日子…~~~~)((原來重播過,土豆是有得看的…))
小小大丈夫 (1988年至1989年) --嘩﹗這是甚麼來的?﹗完全沒印象…上網查過才知有王書麒同林穎嫻…睇完都係無印象。不知何解我很記得林穎嫻係逢暑假先返嚟拍劇,但我又講唔出佢拍過乜喎,查一查…oh﹗原來小時我覺得好好睇《烏金血劍》有佢份…呢部劇starring劉鍚明和周玉女…我懷疑係毒x明事件的源頭…umum…但呢套劇係好睇的﹗ot了…哈哈…

我愛俏冤家 (1989年)--umum,係有夏雨、盧婉欣和張衛健的,完全唔記得有套咁既劇…

公私三文治 (1989年)--如果我無記錯,吳鎮宇、曾華倩、梅小惠、楊羚應該係4兄妹,華倩係好capable的,梅小惠就甩甩漏漏,楊羚就繼續係精靈呀妹咁,呢套野我係好鐘意睇,溫馨又有啲惹笑咁。我記得有一集係阿吳鎮宇有篇小學定唔知中學作文,話佢個妹梅小惠「是一個廢物…」…跟住張作文紙溶溶爛爛咁就咁一句就無,咁阿小惠梗係喊晒口咁…攪完一大餐先知原來仲有下截「利用的天才」咁…哈,個twist位又ok喎﹗但其他集數講過乜我就唔記得了…
婆.媽.女婿 (1989年至1990年) -- 主演有劉青雲、張衛健、羅慧娟咁,無印象睇過…反而我好鐘意劉、羅合演的《人在邊緣》喎﹙黎天王劇中好英偉的說…~~~)((《廟.街.孖兄弟》我就有睇…對不起,這是爛gag))

茶煲世家 (1990年)--廖偉雄和毛舜筠喎﹗死囉…我又係無印象睇過…(怎麼成篇文都係無印象和無睇過﹗)不過睇牌面應該會幾好笑吧﹗

同居三人组 (1990年至1991年)--三人組應該係郭晉安 、李國麟和 李家聲…嘩,睇番佢地廿年前已經擔緊戲,廿年後都仲見到佢地…男藝人是比較襟老的吧(而家播緊三線戲佢地各有份演緊一部…死未﹗)…囧(不好意思說其實這部我都係無印象我睇過囉…)

我愛玫瑰園 (1991年)--嘩﹗乜呢套劇有甄楚倩拍咁爆?﹗呢套我記得啦…袁靚靚嘛,同埋張天王首主題曲好好聽的,但原來啲劇情我mixup了《公私三文治》…是係我完全唔記得《玫瑰園》講乜的…(哈…都係愛情家庭啲溫馨小品野架啦?)

卡拉屋企 (1991年至1992年)--嘩﹗呢套係我至愛啊﹗先不提我到而家仲識唱首主題曲,仲叫緊肥舅父做肥舅父,仲記得吳生和李小姐的一段情,楚原係白頭佬,盧婉欣係肥媽…仲有永遠年青的鄭敬基﹗歐陽波比和高佢好多既翁慧德﹗(佢地係一pair喎﹗)仲有吳生隻狗狗啊﹗劇情其實都唔太記得…總之好多笑料啊﹗某年重播我可是即刻仆番屋企睇的…。Well,看維基的時候…怎麼黎海珊改了名做黎候賽因?﹗囧(不過佢的戲路好像因為這部戲而定型了…都是很梅小惠式的傻傻攪笑女配咁…)。禁不住想唱番兩咀主題曲:「夠鐘啦,睇電視,睇吓今集講乜先,講乜先﹗」(個片頭好似係喺公園啲sir滑梯呀咁度拍的﹗)

愛生事家庭 (1992年至1993年)--我記得首主題曲係「愛生事家庭庭庭…玩野應真醒醒醒…」…套劇好似係初頭攪笑誇張後來因為反應不好而改為溫馨野的(定掉轉呢?﹗)anyway,不太喜歡沒怎樣看…

開心華之里 (1993年至1994年)--咦…乜首主題曲唔係智叔高唱的「開心…開心話之里…」咩?﹗係黎天王唱架?﹗當年睇時我覺得好驚訝點解年青美麗的米雪姐姐會有魏俊傑和朱健鈞兩個咁大既仔呢(《少年五虎》耶﹗哈哈…我到而家都只係記得佢呢套大作)…oh﹗啲角色名如珠如寶懶溫馨咁ok唔得囉對我來說,應該係送飯時才有睇…最記得林漪淇定唔知邊個後來用「華之里」個名嚟開餐廳…仲賣廣告賣到連《NO》都有…好驚…

餐餐有宋家 (1994年至1995年)--呢套應該係繼《卡拉屋企》之後我睇得最多的一套﹗因為古先生演出其中一角啊﹗但由當年到而家我都受唔住點解橫睇掂睇都係古生大過黃小姐,但就要黃小姐演佢家姐…同埋當年古生啲表情真係好生硬…幾好笑的…看點還是尹陽明、張鳳妮(啊…佢好似無拍無記劇好耐了…)和林偉啦…林偉做貪錢OFFICEMAN有啲似《香港8X》阿陳積的…套劇都懶係走溫馨又有啲好笑既路線,但好似後來隔離台《睇真啲》氣勢如虹就越來越唔掂,卒之摺了。加之於拍拍吓古生走咗去拍《神鵰》,咁當然…我都係無追落去啦﹗(結局最尾講阿貴返屋企,那個向仰高頭撥頭髮的鏡頭…oh…實在是太型了…囧)

真情 (1995年至1999年)--「笑聲笑聲…滿載溫馨…」呢首歌老實說真係聽到想嘔…。本來打正旗號做溫馨家庭劇,本來一家人都係好正常的,但為了和對台《睇真啲》對打,不停死人再復生,不停加感情線,不停殺人放火…最奇怪係所有死人LUM樓都發生在叉燒一族身上…真係好得人驚…那一水我係經常和娘爭電視睇的說。…另我到而家都唔明,點解一間屋可以住咁多人…跟住食飯張枱又大過茶樓啲一圍人既枱…好可怕…(我相信這部戲是令我覺得家燕姐所有戲都是笑片的源頭…)

男親女愛 (2000年)--我覺得摺咗《真情》換上《男親女愛》簡直係新世紀無記最大貢獻﹗咁子華哥和DODO姐又真係有火花,幾難得換走啲死人LUM樓可以有套戲笑吓。同埋要多謝阿原子惠令我識得死屍英文叫"DEAD BODY"…XDDDDDD…另…我好似無睇到個大結局…

FM701 (2000年至2001年)--完全無睇過…好似係肥谷和張達明做的吧?今次唔係無印象,係選擇唔睇…

皆大歡喜 (古裝/時裝) (2001年至2005年)--有我最敬愛的家燕姐…SKIP

高朋滿座 (2006年至2007年)--呢水收費台那邊重播緊喎,除了記得有阿旦、KING SIR和伍姑娘外無印象…都係食飯時LAP過少少…

同事三分親 (2007年至2008年)--家庭倫理溫馨劇咗十幾廿年,《同》劇突然轉咗做職場劇,但又O喎﹗抵死的對白和故出的角色性格,OFFICE入面啲人就好似你同我公司啲同事一樣總有一個喺左近,好有共鳴吓的,可惜係一有事唔可以早返屋企就無得睇…據說喜爺無啦啦客串咗一水喎呀呵…另,陳鴻烈成日奸笑既大言生(定閻生?﹗哈哈我真係少睇唔記得架)好有型~

畢打自己人 (2008年至2010年)--突然角色大兜亂疑似原班人馬捧欣宜之作(少少後感見這篇),最後出位的竟然係毛姐和醒哥條感情線…同埋個無啦啦的《無間道》風雲令人頗O咀的…。噢,其實都係要早返屋企先有得睇,感覺都係《同》劇好睇啲…

女王辦公室 (2010年)--我對此劇係頗有期待架﹗咁出嚟…UM,前段好睇啲(特別係MUSIC整古QUEEN姐和SHOPPING魔原來係MUSIC前夫嗰度),後尾啲故仔和啲人開始兒戲和亂嚟…同埋阿十郎個角色好鬼神化…乜咁樣RUN一間公司都得的嗎?最唔開心後尾無咗MUSIC…於是我連大結局都無追了…

天天天晴 (2010年)--據說係延續《畢打》毛姐和醒哥的感情線,再有埋原班人馬再嚟多次…但唔知呢,司棋姐一行出嚟我就諗起大契或善姨,跟住有就一股衝動去轉台…

依家有喜 (2010年至2011年)--睇《囧探》不幸地LAP到少少…嘩﹗又走番家庭溫馨劇路線,但好鬼卡通化吓,即係呢,見阿BIG兒面容扭曲的唧表情出嚟我就感到不安了,同埋醫生應該係專業人士丫?但其行為思想幼稚到呢…囧﹗編劇大佬唔係覺得咁就係好笑嘛?(或者…係有人buy既…囧)…即刻轉去睇經典台好過…,嚟緊一年我都唔使睇處境劇了。以上。

***************************************************
出文之時又有一部新的開拍了…真係轉得快…oh

18 則留言:

  1. 我經常看的,只有"七十三","香港81-86",及"城市故事",其它的,幾乎都沒看過.看近年的所謂處境喜劇,其實都只是電視劇,不太看到跟社會有關係. 很多時候,都是超乎現實,甚至不是喜劇.Anyway, 處境劇向來都是雞肋,也難得TVB 願意花錢.

    28th Jan 2011 18:33 PM

    回覆刪除
    回覆
    1. 其實唔反映時事諷刺時弊都唔緊要,好似《卡啦屋企》、《城市故事》那些輕輕鬆鬆三點鐘都可以,但無記係好似只係識以胡鬧嚟引發笑彈,即係好笑同胡鬧係兩件事囉…唔係話浮誇就一定係好笑…可以係好幼稚和反智,一點都笑唔出的…
      所以前幾年出《同事》和《畢打》時真係覺得耳目一新,終於都捱完啲鬧劇了…可惜家陣又走番回頭路…

      8th Feb 2011 12:13 PM

      刪除
  2. 我諗我第1套識睇既係《公司3文治》,廢物利用果集我都記得呀!哈哈哈

    玫瑰園、華之里、餐餐有宋家果0的無記成日晨早流流6點重播哈哈。古天樂果時仲係白人!

    29th Jan 2011 13:14 PM

    回覆刪除
    回覆
    1. 係嘛?握手﹗真係有人記得廢物利用那集﹗哈哈…
      《宋家》我好有心機追架…當年我覺得白面古生好靚仔的…嗚…

      8th Feb 2011 12:14 PM

      刪除
  3. 我諗我第1套識睇既係《公司3文治》,廢物利用果集我都記得呀!

    30th Jan 2011 04:01 AM

    回覆刪除
    回覆
    1. 真係好多人記得呢集喎﹗

      8th Feb 2011 12:15 PM

      刪除
  4. 卡拉屋企 個片頭 應該係海浪公園 個兒童王國拍架, FM701都係, 華之里都好似係

    31st Jan 2011 11:49 AM

    回覆刪除
    回覆
    1. 你講起我又好似記得華之里片頭喺兒童王國度拍的…
      卡拉屋企我記得主角各人係有騎住啲遊樂場玩意、sir滑梯呀咁,所以成日覺得係喺公園拍的…=P

      8th Feb 2011 12:17 PM

      刪除
  5. 你講起梁思浩, 我就記起佢o係套劇入面好似叫洗米華...卡拉屋企真係好經典, 首歌應該係同年代的都識唱gua...

    31st Jan 2011 17:37 PM

    回覆刪除
    回覆
    1. 除了洗米華,和《雪山飛狐》有個乜鬼一一(無記自己加的角色)…我真係唔記得梁思浩拍過乜劇集呢…哈…
      播爛到不堪的《醫家有喜》,不如重播《卡拉屋企》(押韻﹗)…收視可能會高好多…

      8th Feb 2011 12:18 PM

      刪除
  6. 哈... 我都覺得而家果套《依家有喜》真係無聊頂透、不知所謂呀!!快D 摺埋佢好過啦!!!
    見到你話佢拍完, 真開心呀!!

    1st Feb 2011 17:24 PM

    回覆刪除
    回覆
    1. 我真係好開心佢拍完,寧願《東張西望》做多半個鐘好過囉…
      嚟緊一套好似係講煮餸的,但都好難講,可能只係轉個人轉過個故仔,但路線係一樣的…

      8th Feb 2011 12:20 PM

      刪除
  7. 咁多套入面我至愛"卡拉屋企"同埋"男親女愛". 至於其他嗰啲不談也罷. 家燕真係好, 幫我慳番唔少時間, 有佢出現o既劇多數可以skip唔睇.
    P.S.: "餐餐有宋家"入面嗰個應該張鳳妮.
    而同事三分親o既陳鴻烈角色好似係"大閏先".

    1st Feb 2011 17:31 PM

    回覆刪除
    回覆
    1. 你講既兩套我都好鐘意睇,簡單分類係SKIP走胡鬧的鬧劇(《真情》都越做越浮誇,本來好地地的…)…那半個鐘如果未食飯咪入房上吓網先…
      係呀,係張鳳妮…打漏了個字…已改﹗謝謝…
      (我成日將陳鴻烈在《畢打》和《同事》的角色掉轉了…)

      8th Feb 2011 12:22 PM

      刪除
  8. 當年睇真情真係睇到火滾~~尤其係彩姚死完可以復活﹐變做阿貴﹐真係痴線(怒)
    btw﹐我都覺得天天天晴好有真情影子﹐再見到監製係徐遇安﹐我就知咩事

    9th Feb 2011 05:25 AM

    回覆刪除
    回覆
    1. 《真情》死唔斷條又不停回帶嗰吓難頂,最初都好地地,唔知點解走走吓越來越婆媽,於是我家係轉咗睇《睇真啲》的…
      《天天天晴》一見到司棋就諗起善姨…有啲不安…哈哈…

      17th Feb 2011 10:43 AM

      刪除
  9. 《城市故事》中最有印象係阿立溫兆倫做經理有房坐架。但其實今時今日好多公司就算再高級嘅都未有房坐呀。

    18th Feb 2011 01:46 AM

    回覆刪除
    回覆
    1. 原司要去到director先有囉…
      之前lap到套應該8字尾既劇集(黃華做的),鄧浩光升經理,有10000人工,成家人開心到笑…
      唉…典解10000咁唔見使…嗚嗚嗚…

      18th Feb 2011 09:57 AM

      刪除

要講幾句嗎?﹗XD