今天只做一件事~陳奕迅《H3M》+醫生10首

第一次看見這個封面…我以為係電影造型…個角色係港版Johnny Depp…演魔盜王耶…

這張碟聽了很久，初頭感覺平平無奇同時又有飛佛新碟就放埋一邊了，但這張碟像杯茶，越茗越香，越聽越有味道。

01　Allegro, Opus 3.3 a.m.

小克﹗一路聽一路諗住維港巨星和安安佳佳(同埋被佢地玩謝的細路女，仲有一班迪迪尼人物…)，先入為主都唔聽清楚我就認定歌詞生鬼跳脫的了(最鐘意係「家國愛我填得太過政治」…在串人嗎？﹗XDDD)~當然醫生活潑演譯功不可沒啦…。忽然諗番起舊歌《阿邊個邊個》(《New order》不算抵死那種吧？但個人很喜歡這首呢~)，個人實在很鐘意呢啲抵抵死死又有點玩野的歌呢…

02　還有什麼可以送給你

無論係旋律、歌詞都十分像舊歌《不如這樣》(死啦，我又在想當年了﹗)，送到連世界都送過，最後送既就係自己離別，和《不如這樣》中和情人數十下就轉身走開，那種無奈如出一徹。歌詞寫得淡淡然，不過字裡行間卻是傷感和無奈的說。

03　於心有愧

「原來隨便錯手可毀了人一世」一句很強的說﹗(即刻諗起最近看過的《讀愛》…)。看人家的博說這首和李克人的《她慈我悲》和敬HINS的《披星戴月》是一個series，唔知環球會唔會來個super mega mix呢？﹗看新藝寶的新碟介紹說原來作曲人係想像醫生唱到勁激動左搖右擺個樣寫這首的…哈，我都邊聽邊想像緊的說。

04　今天只做一件事

其實我很喜歡放假留在家無所事事，平時生活太急促，總唔可以停下來做自己想做的事，難得休息日我係真的休息(說實在，我是麻麻地喜歡去旅行…一來我無錢，二來唔捨得幾天花幾千，三來…很頻撲呀去旅行﹗)。但同事朋友聽到放大假時通常都問係咪去旅行(呢方面我係唔多似香港人的…哈)。而家有呢首歌就好了，人家再問我就答佢：「叫皺紋散開　喚青春歸來  因此我喜歡花一天感覺一切是愛」。(XDDDD)

05　一個旅人

公式網頁說這首曲式是有日劇音樂FEEL，又說有旅行FEEL…噢…難怪我麻麻了…

06　七百年後

我沒看《WALL.E》喎…。「文明能壓醉　情懷不衰　無論枯乾山水」、「我們貧乏卻去到金禧」，生命短暫情懷永存…是頗感動的。歌曲很大熱格，應該都係年尾頒獎禮食糊作之一吧…

07　Life Goes On

陳醫生很多碟名都有life一字呢。我常將歌詞和下面一首歌名combine咗，咁人世間事物就係咁喎，你過得開心唔開心太陽都會照常升起，地球係唔會為咗邊個而停下來喎，放鬆啲啦香港人。是首唔hardsell但又好正面的打氣歌~

08　太陽照常升起

我覺得第七cut和第八cut內容都很像的，兩首放在一起就弄得我常分唔清邊首打邊首囉…。anyway，兩首都喜歡~

09　不來也不去

「如煙　因給你遞過火」一句讓我諗起《半支煙》呢…很喜歡旋律但歌詞不太click。

10　沙龍

這首是此碟飛佛啊﹗多得家陣手機和DC，留低人生每個時刻就方便多了。先不要理甚麼技術，留得住眼前時地人給他人的自己回味才重要啊﹗聽著聽著很有共鳴的。很喜歡後段不停數每個要拍照的moment，即刻有很多影像浮在腦中，啊，人生「要拍照的事　可不少」﹗﹗
**********************************************************
真係回想當年啦，九字中後期本人很熱聽古巨基和陳醫生的碟(真係神心地出一隻買一隻架﹗)，實在係手心係肉手背又係肉啊。不過古生在本博出現率好像高過醫生好多呀呵？﹗哈哈哈，其實我都好鐘意聽醫生架﹗

1. 時代曲

 

竟然喺臨回歸時出一隻這樣呻自己坐唔到尾班車的歌，仲要係個新人唱喎，仲要係個英國讀書返嚟的0靚仔唱喎，完全係勁深印象…被攝住了…從此就開始逢碟必買魔咒的開始囉…

2. 預感

唔知點解我很喜歡這種抽心的情歌(話說回頭，那一水古巨基都有首歌叫《預感》的…)，同類飛佛還有《好聚好散》、《愛情幼稚》(呢首勁慘呀…)和後期的《不如這樣》啦…(講開又講，仲有首《Just between the two of us》…《婚禮的祝福》那張碟入面我的飛佛呢)

3. Taipei City 

和上面的《預感》同樣來自陳生第一張國語碟《蘊釀》，當年我未去過台北，就係憑呢隻歌，從此我就覺得台北係一個充滿活力的城市，我懷疑這是我喜歡台北的原因…哈。這隻歌好似係台北觀光甚麼campaign的主題曲…

4. 新曲+精選

歌名串埋一齊，好有型。(此曲來自《我的快樂時代》…長路是漫漫如何經過…嘩…回憶啊﹗)

5. 天使的禮物

一跳就跳咗去英記年代。這首內容很有趣，天使很公平吧好人壞人有錢人窮人都照顧。同埋很喜歡容天后的和聲。

6. 單車 

其實我一路都覺得這首係投訴阿爸愛自己不夠多架喎，點都唔似讚美爸爸吧。聽著聽著想起家父不騎單車，我也沒試過倚著他背脊呢…「如孩兒能付於爸爸的肩膊，誰要下車」…

7. 活著多好

歌詞很touching，活著真係很好的。未知生焉知死，但係點都會想像吓死咗之後在生的人如何，回帶，不要殯儀館送別禮，唔該。

8. New Order 

我覺得成首歌歌詞都很精警的， 03年環境不好吧，歌詞主人翁每天到夜店打工儲錢開書店，見盡來店各式各樣的人臉，悟出做人道理…「想開心不必做富翁」這些…很中囉，而家呢個時勢都啱用啊﹗

9. 不如這樣

傷感情歌之選呢。實在這首歌來自的國語碟《反正是我》也是好歌連連，比起廣東版個人更喜歡國語版《低等動物》，另加快歌類如《Because you're good to me》、《愛是懷疑》，這是本人英記之旅囉~

10. 葡萄成熟時 

又突然飛咗去新藝寶時代了。《U87》最喜歡是這首~

其實數十首唔夠數呢…係咪應該開番幾篇文嚟逐隻碟寫呢？﹗哈哈…呃文呀…

另：仲有首好鐘意的《阿邊個邊個》：阿邊個親戚即係邊個？